වස්තු පැටිය සත්තලනේ
කුංචි කුචුං මැණික් කැටේ
උඹෙ අම්මා කිරට ගියා
කිරි එරවා එන්ට ගියා
පලංචියෙන් බිමට වැටුණු
කබලෙන් ලිප් බොක්කෙ වැටුණු
පැදුරෙන් නිරයටම වැටුණු
අප්ප උඹේ, රොබට් බාස්
රොබට් බාස් තේජවන්ත
පපුව පුරා පිරිමි මවිල්
පියරැ ටින් එකම හලාන
කම්බි ලේන්සුව බැදගෙන
කරක් ගැහුව රොබට් බාස්
අම්ම උඹේ සින්ඩරෙල්ල
ගැණි මගේ සින්ඩරෙල්ල,
අම්ම මගේ සින්ඩරෙල්ල
‘මිනිහ‘ මගේ සින්ඩරෙල්ල
පැදුරැ වියපු සින්ඩරෙල්ල
ඇදුම් මහපු සින්ඩරෙල්ල
සතෙන් සතේ එකතු කරල
අණ්ඩ දාපු සින්ඩරෙල්ල
රොබට් අයිය අක්ක කොහෙද
රොබට් බාස් අපිට බැරිද
පපු කැවුත්ත දනව බොලව්
කණව කැවුතු අදිනව බොකු
රෝද පුටුව තල්ලු කරපු
මගෙ ගූ හුජ්ජ ඇදපු
මැණික්ක් බොල සින්ඩරෙල්ල
හෝදල බිව්වෑකි බොලව් සින්ඩරෙල්ල
ඇහිබැම ගාගෙන පාටට
තොල් රතු කරගෙන ගානට
නොහොබිනාවෙ උඹ යනවද
දහදුරාවෙ උඹ යනවද
මටත් සැකයි සින්ඩරෙල්ල
පියාණෙනී, පව් කෙරැවෙමි
කුසගිනි වෘක්කයන්ට සිරැරම බිලිදෙමි
දිවා රෑ දෙකේ වැලපෙමි
කිළීටි වුනෙමි, පවෙන් පෙළෙමි
ගලින් ගල ගසා මරන්න
මරන්ට පෙර අසාපන්න
මැරෙන්ට පෙර අසාපන්න
පැටියගෙ කුස ගිනි නිවන්න
මිනිහගෙ බැරිකම වහන්න
නැති වූ මිරිවැඩි හොයන්න
කුමරා එනතුරැ බලන්න
වෙන්නද මම
හීන කුමරි සින්ඩරෙල්ල
No comments:
Post a Comment